Y penderfyniad

Sut byddwch chi'n dod i benderfyniad?

Mae'r panel tribiwnlys yn dod i benderfyniad drwy ystyried yr holl dystiolaeth. Mae hyn yn cynnwys y dogfennau y byddwch chi a'r AALl yn eu hanfon cyn y gwrandawiad a'r hyn a gaiff ei ddweud yn y gwrandawiad hefyd. Pa beth bynnag a benderfynir gan y tribiwnlys, bydd yn rhaid i chi a'r AALl dderbyn y penderfyniad hwn.

Pryd y caf wybod eich penderfyniad?

Byddwn yn gwneud ein gorau i bostio ein penderfyniad a'r rhesymau dros y penderfyniad hwnnw atoch chi a'r AALl o fewn 10 diwrnod gwaith i'r gwrandawiad. Bydd angen ychydig mwy o amser ar gyfer rhai achosion cyn y gallwn anfon y penderfyniad. Ni allwn ddweud wrthych chi (na'r AALl) beth yw ein penderfyniad dros y ffôn.

A allaf ofyn i chi ailystyried?

Gallwch chi a'r AALl ofyn i ni adolygu ein penderfyniad os credwch fod problem dechnegol ynglyn â'r penderfyniad neu'r ffordd y gwnaed y penderfyniad. Ni fyddwn yn adolygu ein penderfyniad am y rheswm syml nad ydych yn fodlon arno. Mae'n rhaid i ni dderbyn eich cais o fewn 10 diwrnod gwaith i'r dyddiad y gwnaethom gyhoeddi'r penderfyniad. Mae'n rhaid i'r cais hwnnw nodi eich holl resymau. Nid yw adolygiad yn disodli apêl i'r Uchel Lys.

A allaf apelio i'r llysoedd yn erbyn eich penderfyniad?

Gallwch chi a'r AALl apelio i'r Uchel Lys yn erbyn ein penderfyniad ond ar bwyntiau'n ymwneud â'r gyfraith yn unig. Os bydd angen cyngor arnoch ynglyn â hyn, bydd cyfreithiwr neu gorff gwirfoddol yn gallu eich helpu. Bydd gennych 28 diwrnod o'r dyddiad y cyhoeddwyd y penderfyniad i apelio i'r Uchel Lys.

Faint o amser sydd gan yr AALl i roi eich penderfyniad ar waith?

Ar ôl i ni benderfynu ar eich apêl, oni bai fod adolygiad neu apêl i'r Uchel Lys, mae'n rhaid i'r AALl ddilyn y penderfyniad o fewn cyfnod penodol, gan ddechrau gyda'r dyddiad y gwnaethom gyhoeddi ein penderfyniad. Yn dibynnu ar y math o apêl, dylai'r AALl ddilyn y terfynau amser isod.

• I gychwyn y broses asesu neu ailasesu - 4 wythnos;
• I wneud datganiad - 5 wythnos;
• I newid datganiad - 5 wythnos;
• I newid yr ysgol a enwir yn unol â dymuniad y rhieni - 2 wythnos;
• I barhau â datganiad - yn syth;
• I ganslo (rhoi'r gorau i gynnal) datganiad - yn syth.

Mae'r terfynau amser hyn hefyd yn gymwys pan fydd yr AALl yn dweud wrthym nad yw'n gwrthwynebu'r apêl.

Beth os na fydd yr AALl yn gweithredu ar eich penderfyniad?

Mae'n rhaid i'r AALl weithredu ar ein penderfyniad yn ôl y gyfraith. Os na fydd yr AALl wedi gwneud hyn o fewn cyfnod rhesymol o amser, gallwch ysgrifennu at Gynulliad Cenedlaethol Cymru i gwyno.

A fydd yn rhaid i mi dalu unrhyw gostau os byddaf yn colli'r apêl?

Fel arfer, ni fydd yn rhaid i chi na'r AALl dalu costau eich gilydd. Mewn amgylchiadau prin iawn, os credwn eich bod chi neu'r AALl wedi ymddwyn yn afresymol, neu wedi gwastraffu ein hamser yn fwriadol, efallai y bydd yn rhaid i'r AALl dalu eich costau chi, neu efallai y bydd yn rhaid i chi dalu eu costau hwy.